Fil-bidu ta’ dan ix-xahar miet l-Avukat Joe Brincat li ddedika ħajtu biex iservi lill-poplu tagħna u lill-pajjiżna b’mod eżemplari.
F’Diċembru 1986 l-Avukat Joe Brincat kien attenda għall-funeral taż-żagħżugħ attivista Nazzjonalist Raymond Caruana li kien ġie maqtul b’tiri tan-nar waqt li kien qiegħed fil-Każin tal-PN tal-Gudja.
Ma kienx faċli tattendi funeral ta’ żagħżugħ tal-partit kontrik u meta nies mill-partit tiegħek kienu akkużati li qatluh.
Kien żmien ta’ firda u mibegħda tribali partiġġjana fil-kriżi tal-elezzjoni 1981 b’sistema elettorali li kienet tippermetti li l-PN ġab il-maġġoranza tal-voti u ma ggvernax.
Il-ġest li jmur għall-funeral juri l-valuri umani li Brincat għex u ħadem għalihom fis-snin twal li għamel iservi lill-pajjiżna bħala politiku Laburista fl-oqsma tad-djar, l-artijiet, ġustizzja, affarijiet parlamentari, ambjent u kultura nazzjonali.
Għal Joe Brincat il-politika ma kinetx gwerra bejn l-għedewwa.
Serva wkoll lill-poplu tagħna bħala reliġjuż, kittieb, għalliem, uffiċċjal fiċ-ċivil, avukat, editur u rappreżentant Malti fil-Kunsill tal-Ewropa.
Baqa’ dejjem jaħseb b’moħħu minkejja li kien f’partit politiku u f’kabinett.
Kien lest jieħu posizzjonijiet mhux popolari anki fir-realta’ partiġġjana u klijentelari lokali u minħabba f’hekk ġie li ma telax.
Joe Brincat qatt ma sar ilsir tal-poter jew tal-posizzjonijiet għolja u prestiġġjużi.
Uża l-intelliġenza fina tiegħu, il-ħila li jitkellem u jikteb b’mod effettiv, is-sens ta’ umoriżmu tiegħu għall-ġid tal-poplu tagħna u ta’ pajjiżna.
Wera li anki jekk tagħmel snin twal fil-politika tista’ tibqa’ onest u diċenti fejn tgħix il-politika bħala servizz għall-ġid komuni u mhux għall-interessi persunali tiegħek.
Papa Franġisku u l-politika
“Il-politika ma tantx tgawdi rispett. Imma l-politika, mhux il-logħob politiku, hija dik li tisma’ biex tipprova tifhem x’inhu għaddej … li qiegħda hemm biex isservi lill-fqar … u tieħu ħsieb lil dawk bla xogħol … jekk narawha hekk il-politika tkun iżjed nobbli milli tidher.” (Papa Franġisku).
Matul dan ix-xahar ta’ Awwissu Papa Franġisku jixtieq li jsir talb għall-politiċi: “Għal dawk il-politiċi li jservu lill-poplu tagħhom, li jaħdmu għall-iżvilupp sħiħ uman, li jieħdu ħsieb lil dawk li jitilfu x-xogħol u li jpoġġu l-ewwel lil dawk li huma l-iżjed fqar.”
Huwa qal li “għandna nitolbu għall-mexxejja politiċi u għandna nkunu grati lejn dawk il-politiċi li huma mpenjati li jservu, mhux għall-poter, iżda li jaħdmu kemm jifilħu għall-ġid komuni.”
Għaliex nitolbu għall-politiċi?
Il-Ġiżwita Frédéric Fornos li jmexxi l-Programm Internazzjonali Papali tat-Talb jistaqsi: “Għaliex għandna nitolbu għall-mexxejja politiċi? Il-politiċi huma kif nagħmluhom aħna. Minflok inxerdu l-istmerrija fi kliemna u fi ħsiebna dwarhom, għandna ngħinuhom isiru l-irġiel u n-nisa kif nixtiequhom. Ejja nitolbu għalihom kif jistedinna Papa Franġisku.”
Patri Fornos jgħid li waqt li hemm mexxejja politiċi mimlija regħba u b’kilba għall-poter, hemm ħafna li jaħdmu għall-ġid komuni.
Isaqsi: “Aħna x’qed nagħmlu? Kieku minflokhom x’nagħmlu? L-inqas li nistgħu nagħmlu hu li nitolbu għalihom.”
Rispett bil-fatti
Rat lill-kennies jiknes fit-triq tagħha taħt xemx tikwi.
Ħarġet fil-gallerija u staqsietu: “Tixtieq ftit frott u ilma frisk?”
Qalilha: “Iva, jekk jogħġbok.”
Daħlet ġewwa u reġgħet ħarġet u newlitlu l-frott u l-ilma.
“Grazzi ħafna qalilha.”
Qaltlu: “Grazzi li tiġi tnaddfilna.”
U reġgħet daħlet ‘il ġewwa.
Suppost imexxi
Kien suppost imexxi skola.
Flok surmast kien sar tapit.
L-istudenti u l-għalliema
Kulħadd jagħmel bih li jrid.
Mhux billi jkollok xi titlu.
Biex ma taqax għaż-żufjett.
Trid tkun taf tmexxi bil-għaqal
U hekk tirbaħ ir-rispett.
Skont it-tieqa
Wieħed qalli li hu bnazzi.
L-ieħor qalli li maltemp.
Dan hu qrunu, qalli ieħor.
Le, qal ieħor. Dan id-denb.
L-ieħor faħħar il-frott helu.
L-ieħor maqdru kemm hu qares.
Faċli tinsa illi tara
skont mil-liema tieqa tħares.
Torċa 25 Awwissu 2024