L-għan ewlieni tal-President Amerikan Joe Biden u tas-Segretarju tal-Istat Anthony Blinken kien li Malta tintrabat mal-Punent u sservi biex tikber l-influwenza Amerikana fin-nofs tal-Mediterran.

Dan huwa ddikjarat f’rapport tad-Dipartiment tal-Istat Amerikan tas-26 ta’ April 2022. Ir-rapport: ‘Integrated Country Strategy Malta’ isemmi l-pjan ta’ ħidma ta’ l-Istati Uniti mal-forzi armati u mas-servizz tas-sigurtà biex Malta u n-NATO jikkoperaw dejjem eqreb flimkien u tissaħħaħ l-għaqda Trans-Atlantika bejn l-Istati Uniti u l-Ewropa.

Il-pjan għas-snin 2022-2025 jgħid li l-Istati Uniti u Malta jaħdmu flimkien biex iċ-Ċina, ir-Russja u pajjiżi “malinni” oħra ma jifirxux l-influwenza tagħhom f’Malta u fil-Mediterran.

L-impenn tal-gvern ta’ Biden li jorbot lil Malta mal-Punent imur kontra l-Kostituzzjoni tagħna, imur kontra n-newtralità ta’ Malta li ma tintrabat mal-ebda alleanza militari, tkun ħabiba ma’ kulħadd u taħdem għall-paċi u l-progress.

Ireġġa’ l-arloġġ lura għal meta konna bażi militari, li l-għeluq tagħha qed infakkru dawn il-jiem.

X’se jinbidel għalina?

Se jkun interessanti x’se jgħid il-pjan il-ġdid tad-Dipartiment tal-Istat Amerikan għal Malta issa li bdiet it-tmexxija tal-President Donald Trump.

Huwa beda jsewwi r-relazzjonijiet mar-Russja u waqqaf il-fondi li kienu jingħataw lil nies fil-midja u fl-għaqdiet governattivi madwar id-dinja, anki f’Malta, permezz tal-USAID u ta’ programmi oħra.

Trump tela’ bl-għajta ‘Make America Great Again’ u jagħmel dak li jaħseb jaqbel għall-Amerika u ma jimpurtahx kif jintlaqtu pajjiżi oħra. Imma anki Biden u Blinken kienu jpoġġu l-interess Amerikan l-ewwel kif kienu jimxu magħna. Ma kienx jimpurtahom li hu fl-interes tagħna li nkunu ħbieb ta’ kulħadd u li ma nintużawx kontra ħaddieħor.

F’dan it-taqlib kbir li għaddej fid-dinja tajjeb naraw kif nieħdu ħsieb tagħna nfusna bħala Malta. L-ebda pajjiż ieħor mhu se jieħu ħsiebna għalina.

Fir-relazzjonijiet bejn pajjiż u ieħor, meta jitlewmu, hemm min jemmen li bilfors jirbaħ wieħed u jitlef l-ieħor. Imma hemm min jemmen li jista’ jintlaħaq qbil u ż-żewġ pajjiżi jirbħu.

Malta 2100

Sa 75 sena oħra, sas-sena 2100, il-popolazzjoni ta’ Malta mistennija tonqos bi 34%, b’185,000 ruħ.

Dan se jiġri għax Malta hi fost dawk il-pajjiżi Ewropej, li lanqas qed ikollhom tfal, b’rata ta’ 1.1%.

Biex id-daqs tal-popolazzjoni jibqa’ kif inhu, ir-rata trid tkun ta’ 2.1%. Jekk tkun ogħla, il-popolazzjoni tikber. Jekk titbaxxa tiċkien.

F’ħafna pajjiżi Ewropej ir-rata tat-twelid naqset fl-aħħar 40 sena. Bħalissa l-medja hi 1.4.

Sas-sena 2100, il-popolazzjoni Ewropea mistennija tonqos b’20%, jiġifieri b’iżjed minn 152 miljun.

Jekk jiċkienu, jiftaqru

L-Italja mistennija tiċkien bi 23 miljun ruħ. Anki pajjiżi bħall-Polonja u l-Ungerija li qed jieħdu passi biex iżidu r-rata tat-twelid, xorta se jiċkienu għax mhux qed jilħqu r-rata ta’ 2.1 jew ogħla.

Meta l-popolazzjoni tiċkien, tiċkien l-ekonomija u jonħoloq inqas ġid u jinġabru anqas taxxi u jonqsu s-servizzi soċjali.

L-unika żieda fil-popolazzjoni tal-Ewropa se tkun ġejja minn nies li jaslu minn pajjiżi oħra.

Il-pajjiżi Ewropej qed ikollhom l-għażla diffiċli bejn li jiċkienu u jitbaxxa l-livell tal-għixien jekk jagħlqu l-bibien għall-ħaddiema barranin jew iġibu aktar nies minn pajjiżi oħra skont kemm għandhom bżonn u jaraw kif jegħelbu l-isfidi differenti li dan iġib miegħu.

Torċa 30 Marzu 2025